ព្រះសីហនុ៖ ក្រោយធ្វើតេស្តរកសារធាតុញៀនលើមន្ត្រីរដ្ឋបាលខេត្តព្រះសីហនុ មន្ទីរ និងអង្គភាពចំណុះពាក់ព័ន្ធ ចំនួន ៣៤៥នាក់ កាលពីថ្ងៃទី២៦ ខែកុម្ភៈ ឆ្នាំ២០២៤ រកឃើញសុទ្ធតែអវិជ្ជមានទាំងអស់ ពោលមិនមានមន្ត្រីណាម្នាក់ពាក់ព័ន្ធ និងប្រើប្រាស់គ្រឿងញៀនឡើយ។ នេះបើតាមព័ត៌មានផ្សាយលើទំព័រហ្វេសប៊ុករបស់នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត នាថ្ងៃទី២៨ ខែកុម្ភៈ ឆ្នាំ២០២៤។

សម្តេចធិបតី បានកោតសរសើរ និងវាយតម្លៃខ្ពស់ដល់មន្ត្រីទាំង ៣៤៥រូប ក្នុងខេត្តព្រះសីហនុ ដែលបានចូលរួមជាមួយនឹងវិធានការរបស់រាជរដ្ឋាភិបាល និងបង្ហាញភាពស្អាតស្អំ ក្នុងនាមជាគំរូដល់ប្រជាពលរដ្ឋ។

យុទ្ធនាការធ្វើតេស្តរកសារធាតុញៀនលើមន្ត្រីរដ្ឋបាលខេត្តព្រះសីហនុ អនុវត្តតាមបទបញ្ជារបស់នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត កាលពីថ្ងៃទី២០ ខែកុម្ភៈ ឆ្នាំ២០២៤ តម្រូវឱ្យធ្វើតេស្តរកសារធាតុញៀនលើមន្ត្រីរាជការទាំងថ្នាក់ជាតិ និងថ្នាក់ក្រោមជាតិ បើរកឃើញមន្ត្រីណាពាក់ព័ន្ធ នឹងត្រូវបណ្តេញចេញពីក្របខណ្ឌដោយមិនមានការលើកលែងឡើយ។

កន្លងមកមន្ត្រីក្រោមឱវាទក្រសួងមហាផ្ទៃជាច្រើនរូបត្រូវបានបណ្តេញចេញពីក្របខណ្ឌដោយសារតែប្រើប្រាស់ និងពាក់ព័ន្ធគ្រឿងញៀន៕